PARESOL NEFRO

PARESOL NEFRO 5,4% venadaxili infuziya üçün məhlul
PARESOL® NEPHRO 5,4%

Tərkibi
Təsiredici maddələr: 250 ml məhlulun tərkibində 0,75 q L-fenilalanin, 1,75 q L-izoleysin, 1,25 q
L-histidin, 1,75 q Lleysin, 2,0 q L-lizin hidroxorid (1,6 q L-lizin ekvivalent),
1,7 q L-metionin, 2,0 q L-treonin, 0,5 q L-triptofan, 2,25 q L-valin.
Köməkçi maddələr: natrium metabisulfit, natrium edetat, xlorid turşusu, inyeksiya üçün su.

Təsviri
Şəffaf məhluldur.

Farmakoterapevtik qrupu
Parenteral qidalanma üçün məhlul.
ATC kodu: B05BA01.

Farmakoloji xüsusiyyətləri
Farmakodinamikası
PARESOL® NEFRO 5,4% böyrək patologiyası zamanı istifadə olunan spesifik amin turşu qarışığından ibarət venadaxili infuziya üçün məhluldur.
PARESOL® NEFRO 5,4% səkkiz əvəzolunmayan və bir qismən əvəzolunan (L-histidin) amin turşularından ibarətdir. Amin turşuları zülal sintezi üçün mənbə rolunu oynayır. PARESOL® NEFRO 5,4% məhlulunun tərkibində olan amin turşularının L-formada olması onlara zülalların biosintezində birbaşa iştirak etməsi üstünlüyünü verir.
PARESOL® NEFRO 5,4% böyrəklərin funksiyası pozulmuş pasiyentlərə aşağıdakı təsirləri göstərir: qanda azotun miqdarını azaldır, sidik cövhərinin ekskresiyasını asanlaşdırır və amin turşularının səviyyəsini normallaşdırır. Bundan əlavə, böyrək çatışmazlığı olan xəstələrdə nevroloji vəziyyəti yaxşılaşdırır, böyrək mənşəli ensefalopatiya simptomlarını azaldır. PARESOL® NEFRO 5,4% əməliyyatdan sonrakı dövrdə orqanizmin amin turşularına olan ehtiyacını ödəyir, azot balansını təmin edir.
Farmakokinetikası
Plazmada olan sərbəst amin turşularının konsentrasiyası əhəmiyyətli dərəcədə dəyişkənliyə məruz qalır, bu həm fərdi amin turşuları, həm də onların ümumi konsentrasiyasına aiddir. Vena daxilinə yeritdikdən sonra amin turşuları zülal sintezinə qoşulur. Proteinlərin və digər biomolekulların biosintezində iştirak etməyən, artıq miqdarda qalan amin turşuları orqanizmdə toplanmır (yağ turşularından və qlükozadan fərqli olaraq), alfa-amino qrupunun dezaminləşdirilməsi yolu ilə parçalanır, böyrəklərlə atılan sidik cövhərinin əmələ gəlməsi ilə nəticələnən metabolizm prosesinə uğrayır. Amin turşularının yalnız çox az hissəsi (5%) dəyişilməmiş şəkildə orqanizmdən xaric olur.

İstifadəsinə göstərişlər
Kəskin böyrək çatışmazlığı, xroniki böyrək çatışmazlığı olan pasiyenlərin kifayət qədər qidalanmaması, böyrək əməliyyatı keçirmiş pasiyentlər, hemodializ kursları keçən xəstələr.

Əks göstərişlər
Tərkibində olan komponentlərdən hər hansı birinə qarşı yüksək həssaslıq, amin turşu mübadiləsinin irsi pozğunluğu.

Xüsusi göstərişlər və ehtiyat tədbirləri
Preparat təyin olunan zaman turşu-qələvi və su-elektrolit balansına nəzarət olunmalıdır. Qanın bu göstəriciləri mütləq analiz olunmalıdır: qanda şəkər, qanda zülal, qaraciyər və böyrəklərin funksional vəziyyəti, hematoloji profil, CO2 birləşdirmə qabiliyyəti, zərdabın osmolyarlığı, qanda ammonium və qanın ümumi həcmi. Uşaqlarda və yenidoğulmuşlarda yüksək dozada istifadəsi hiperammoniemiya törədə bilər. Ağır qaraciyər çatışmazlığı olan pasiyentlərdə preparatın istifadəsi qanda aminturşu disbalansını və hiperammoniemiyanı daha da kəskinləşdirə bilər.
Tərkibində hidrogen xlorid olduğundan gündəlik elektrolit balansına nəzarət olunmalıdır. Əks halda hiperxloremiya müşahidə oluna bilər. Xüsusilə diabetli pasiyentlərdə kalori qəbulu nəzərə alınmalıdır.

Digər dərman vasitələri ilə qarşılıqlı təsiri
Qeydə alınmamışdır.
Məhlula digər preparatların əlavə edilməsi arzu olunmazdır.

Hamiləlik və laktasiya dövründə istifadəsi
Hamiləlik və laktasiya dövrlərində istifadəsi barədə məlumat yoxdur.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Müalicə dövründə nəqliyyatı idarə etməkdən və yüksək diqqət və sürətli psixomotor reaksiyalar tələb edən digər təhlükəli fəaliyyət növləri ilə məşğul olmaqdan çəkinmək lazımdır.

İstifadə qaydası və dozası
Doza pasiyentin kliniki vəziyyətinə və orqanizmin amin turşularına, elektrolitlərə və mayeyə olan ehtiyacına görə təyin olunur.
Vena daxilinə damcı yolu ilə, 15 – 20 damcı/dəq. sürəti ilə yeridilməlidir. Gündəlik doza 250-500 ml (1-2 flakon) təşkil edir, istifadə müddəti həkim tərəfindən təyin edilir.
Yalnız zədələnməmiş flakonlarda olan şəffaf məhlul istifadə olunmalıdır. Flakon açıldıqdan dərhal sonra istifadə olunmalıdır. Hər flakon yalnız bir dəfə istifadəyə yararlıdır, istifadə olunduqdan sonra artıq qalan hissə atılmalıdır. Məhlulun tərkibində natrium-metabisulfit olduğundan bəzi həssas şəxslərdə, xüsusilə astmalı xəstələrdə allergik reaksiya, tutma baş verə bilər

Əlavə təsirləri
Əlavə təsirlərin tezliyi aşağıdakı parametrlərlə təyin edilir: çox tez-tez (≥ 1/10); tez-tez (≥ 1/100 - < 1/10); bəzən (≥ 1/1000 - < 1/100); nadir hallarda (≥ 1/10000 - < 1/1000); çox nadir hallarda (< 1/10000); məlum deyil (əldə olan məlumatlar görə tezliyi qiymətləndirmək mümkün deyil).
PARESOL® NEFRO 5,4% böyrək funksiyası pozulmuş pasiyentlər tərəfindən adətən yaxşı qəbul olunur.
Məhlulun yeridilməsi zamanı həmçinin, aşağıdakı əlavə reaksiyalar müşahidə oluna bilər.
Bəzən (≥ 1/1000 - < 1/100)
Allergik reaksiyalar
Nadir hallarda (≥ 1/10000 - < 1/1000)
Damar boyu ağrılar, vazodilatasiya, ürəkbulanma, qusma, qızdırma, titrətmə, taxikardiya (xüsusilə, məhlul vena daxilinə sürətlə yeridilərsə), abdominal ağrı, qıcolma.
Əgər həssaslığın artması əlamətləri müşahidə olunarsa, PARESOL® NEFRO 5,4% istifadəsi dərhal dayandırılmalı və mövcud halın aradan qaldırılmasına yönəlmiş müalicə aparılmalıdır. İnyeksiya yerində flebit və tromboflebit əmələ gələ bilər. Bu halda digər inyeksiya yeri seçilməlidir.

Doza həddinin aşılması
Doza həddinin aşılması barədə məlumat yoxdur.

Buraxılış forması
250 ml, flakonlarda. Flakonlar, içlik vərəqə ilə karton qutuya qablaşdırılır.

Saxlanma şəraiti
25 °C-dən yüksək olmayan temperaturda, uşaqların əli çatmayan yerdə saxlamaq lazımdır. Məhsul işığa həssas olduğundan qəbuldan öncə işığın uzunmüddətli təsirindən qorunmalıdır.

Yararlılıq müddəti
2 il.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı
Biondustriya Laboratorio İtalyano Medisinali S.p.A., İTALİYA.

Ünvan
Via De Ambrosiis, 2-15067 Novi Ligure (AL), İtaliya.

Qeydiyyat vəsiqəsinin ahibi

Biondustriya Laboratorio İtalyano Medisinali S.p.A., İTALİYA.