DOKLOPİD
DOKLOPİD örtüklü tabletlər
DOCLOPID
Beynəlxalq patentləşdirilməmiş adı: Clopidogrel
Tərkibi
Təsiredici maddə: 1 tabletin tərkibində 75 mq klopidoqrel (klopidoqrel hidrosulfat şəklində)
vardır.
Köməkçi maddələr: mikrokristallik sellüloza, susuz kolloidal silisium dioksid, krospovidon, təmizlənmiş
talk, qarğıdalı nişastası, maqnezium stearat.
Örtük: hipromelloza (E464), qırmızı dəmir oksidi (E172), təmizlənmiş talk, PEG 6000,
titan dioksid (E171).
Təsviri
Hər iki tərəfi düz olan, qırmızı-qəhvəyi rəngli yuvarlaq formalı örtüklü tabletlərdir.
Farmakoterapevtik qrupu
Antitrombotik vasitələr. Trombositlərin aqreqasiyasının inhibitorları (heparin istisna olmaqla).
ATC kodu: B01AC04.
Farmakoloji xüsusiyyətləri
Trombositlər qırmızı və ağ qan hüceyrələrindən daha kiçikdir və qanın laxtalanması zamanı laxtalar əmələ gətirir. Antitrombositar dərman maddələri bu laxtalanmaya mane olmaqla, qan laxtalanması riskini aşağı salırlar (qan laxtasının formalaşma prosesinə tromboz deyilir).
Doclopid preparatından aterosklerotik dəyişikliklər olan qan damarlarının (arteriyaların) içərisində qan laxtasının (trombun) əmələ gəlməsinin qarşısını almaq məqsədilə istifadə edilir. Aterotromboz iflic, ürək tutmaları və ya ölüm kimi aterotrombotik hallara gətirib çıxara bilir. Həkim Doclopid preparatını sizə aşağıdakı səbəblərdən biri və ya bir neçəsinin olması ilə əlaqədar olaraq təyin edə bilər: damarların trombozu (aterotromboz), əvvəllər ürək tutması, iflic və ya periferik arteriya xəstəliyinin keçirilməsi, “gərginlik stenokardiyası” adı verilən şiddətli sinə ağrıları və ya "miokard infarktının” (ürək tutması) keçirilməsi. Bu vəziyyətdə həkiminizin sizə asetilsalisil turşusu da təyin etməsi lazım gəlir (asetilsalisil turşusu ağrıkəsici, qızdırmasalıcı və qanın laxtalanmasının qarşısını alan bir çox dərman maddəsinin tərkibinə daxil olan bir maddədir).
İstifadəsinə göstərişlər
Aterotrombotik pozğunluqların 2-cili profilaktikası
Miokard infarktı (bir neçə günündən başlayaraq 35 gün ərzində), işemik insult (7-ci günündən başlayaraq 6 ay ərzində) keçirən və ya periferik arteriyaların xəstəliklərindən əziyyət çəkən yetkin yaşlı pasiyentlərdə aterotrombotik pozğunluqların profilaktikası.
Kəskin koronar çatışmazlıq sindromu qeyd olunan yetkin yaşlı pasiyentlərdə aterotrombotik pozğunluqların profilaktikası:
• asetilsalisil turşusu (AST) ilə kombinasiyada perkutan koronar müdaxilənin gedişində stentləşməyə məruz qalan pasiyentlər daxil olmaqla, ST seqmentinin yüksəlməsi qeyd olunmayan kəskin koronar çatışmazlığı sindromu (qeyri-stabil stenokardiya və ya Q dalğası olmayan miokard infarktı);
• AST ilə kombinasiyada trombolitik müalicənin aparılması üçün müvafiq medikamentoz müalicə qəbul edən pasiyentlərdə ST seqmentinin yüksəlməsi ilə müşayiət olunan kəskin miokard infarktı.
• pasiyentdə, qulaqcıqların fibrillyasiyası adlandırılan qeyri-müntəzəm ürək ritmi müşahidə olunduqda və pasiyent yeni trombların əmələ gəlməsinin və artıq mövcud trombların inkişaf etməsinin qarşısının alınması üçün istifadə olunan “oral antikoaqulyantlar” adlandırılan preparatlardan (yəni, K vitaminin antaqonistlərindən) istifadə edə bilmədiyi halda. Pasiyentə izah etmək lazımdır ki, belə vəziyyətlərdə asetilsalisil turşusunun və ya asetilsalisil turşusunun Doclopid preparatı ilə kombinasiyasının istifadəsi ilə müqayisədə, “oral antikoaqulyantlar” daha effektivdir. Pasiyent “oral antikoaqulyantlardan” istifadə edə bilmədikdə və pasiyentdə ağır qanaxmanın inkişaf etmə riski qeyd olunmadığı halda, həkim pasiyentə Doclopid preparatını və asetilsalisil turşusunu təyin etməlidir.
Əks göstərişlər
Aşağıdakı hallarda Doclopid preparatını qəbul etmək əks-göstərişdir
• Klopidoqrelə və ya bu dərman preparatının hər hansı digər inqrediyentinə qarşı allergiya (yüksək həssaslıq).
• Hazırda mədə xorası və ya beyindaxili qanaxma kimi qanaxmaya səbəb olan xəstəliklərin olması.
• Kəskin qaraciyər xəstəliyi.
Bu şərtlərdən hər hansı birinin sizə aid olduğunu düşünürsünüzsə və ya ümumiyyətlə şübhələnirsinizsə, Doclopid preparatını qəbul etməzdən öncə həkiminizlə məsləhətləşin.
Xüsusi göstərişlər və ehtiyat tədbirləri
Aşağıdakı hallarda Doclopid preparatını qəbul etməzdən öncə həkiminizlə və ya əczaçı ilə məsləhətləşin.
• Aşağıda göstərilən qanaxma riskləri olduğu halda:
• daxili qanaxma riskini təşkil edən xəstəlik (mədə xorası kimi),
• daxili qanaxmaya meyllilik yaradan qan dövranının pozulması (hər hansı bir toxumalar, orqanlar və ya oynaqlar daxilində qanaxma),
• Yaxın zamanlarda ciddi zədələr,
• Yaxın zamanlarda əməliyyat (stomatoloji əməliyyat daxil olmaqla),
• Qarşıdakı yeddi gün ərzində nəzərdə tutulan əməliyyat (stomatoloji əməliyyat daxil olmaqla)
• beyin arteriyanızda son yeddi gün ərzində yaranmış tromb (işemik insult) olduğu halda,
• sizdə böyrək və qaraciyər xəstəliyi olduğu halda,
• xəstəliyinizin müalicəsində istifadə edilən hər hansı dərman preparatına qarşı allergiya və ya reaksiyanız olduğu halda.
Doclopid preparatını qəbul etdiyiniz müddət ərzində
• Həkiminizə nəzərdə tutulan əməliyyat (stomatoloji əməliyyat daxil olmaqla) haqqında bildirməlisiniz.
• Həmçinin izah olunmayan həddindən artıq yorğunluq, şüurun dumanlanması, dərinin və ya gözlərin saralma (sarılıq) əlamətlərinin olması və ya olmaması ilə hərarət və qırmızı nöqtələr kimi görünən dərialtı qançırla olan xəstəlik (Trombotik Mikroangiopatiya və ya TMA kimi tanınan) baş verdiyi halda həkiminizə dərhal bildirməlisiniz. (bax “əlavə təsirlər”).
• Özünüzə xətər yetirdikdə və ya zədələdikdə, qanaxmanı saxlamaq adi vaxtdan daha uzun çəkə bilər. Bu, qan laxtalarının formalaşmasının qarşısını aldığı səbəbdən, dərman preparatının necə təsir etməsi ilə əlaqədardır. Kiçik kəsiklər və zədələr, məsələn özünü kəsmə, qırxma halları, adətən, heç bir narahatlıq doğurmur. Lakin, qanaxma sizdə narahatlığa səbəb olursa, dərhal həkiminizlə əlaqə saxlayın. (bax “Əlavə təsirləri”).
• Həkiminiz qan analizinin keçirilməsini tələb edə bilər.
Digər dərman vasitələri ilə qarşılıqlı təsiri
Reseptsiz buraxılan dərman preparatları da daxil olmaqla, hazırda qəbul edilən, bu yaxınlarda qəbul edilən və ya qəbul edilə bilən hər hansı dərman preparatı haqqında həkimə və ya əczaçıya məlumat vermək lazımdır.
Bəzi digər dərman preparatları Doclopidin effektivliyinə təsir göstərə bilər və ya əksinə.
Xüsusi olaraq aşağıdakı preparatları qəbul etdiyinizi həkiminizə bildirməlisiniz:
• oral antikoaqulyantlar, qanın laxtalanma qabiliyyətini aşağı salan dərman preparatları,
• IIb/IIIa qlikoproteinin inhibitorları,
• asetilsalisil turşusu,
• əzələ və ya oynaqlarda ağrı və/və ya iltihabı aradan qaldırmaq üçün istifadə edilən qeyri-steroid iltihabəleyhinə preparatlar,
• qanın laxtalanma qabiliyyətini azaltmaq üçün istifadə edilən heparin və ya istənilən digər inyeksiya dərman vasitələri,
• tiklopidin, digər antitrombositar vasitə,
• serotoninin geriyə udulmasının selektiv inhibitorları (fluoksetin və ya fluvoksamin daxil olmaqla, lakin təkcə onlarla məhdudlaşmayan), adətən depressiyanın müalicəsində istifadə olunan dərman vasitələri,
• omeprazol və ya ezomeprazol (mədə pozğunluğunun müalicəsi üçün istifadə olunan dərman preparatları),
• flukonazol və ya vorikonazol (bakterial və ya göbələk infeksiyalarının müalicəsi üçün dərman preparatları),
• efavirenz, İİV (insan immun çatışmazlığı virusu) infeksiyasını müalicə edən preparat,
• karbamazepin (epilepsiyanın bəzi növlərinin müalicəsi üçün istifadə edilən dərman preparatları), moklobemid (depressiyanın müalicəsi üçün istifadə olunan dərman preparatları),
• repaqlinid, diabetin müalicəsində istifadə edilən preparat,
• paklitaksel, xərçəngin müalicəsi üçün istifadə edilən preparat,
• antiretrovirus dərman preparatları (İİV infeksiyalarının müalicəsində istifadə edilən preparatlar).
Ağrı və qızdırmanı aradan qaldırmaq üçün istifadə edilən bir çox dərman preparatlarının tərkibində olan asetilsalisil turşusunun təsadüfi istifadəsi (24 saat müddətində 1000 mq-dan çox olmayaraq) adətən heç bir problemə səbəb olmur, lakin digər hallarda uzunmüddətli istifadəsi zamanı həkiminizlə məsləhətləşməlisiniz.
Hamiləlik və laktasiya dövründə istifadəsi
Hamiləlik dövründə bu preparatın istifadəsi tövsiyə edilmir.
Hamilə olduğunuz və ya hamilə olduğunuzdan şübhələndiyiniz halda, Doclopid preparatını qəbul etməzdən öncə həkiminizlə və ya əczaçı ilə məsləhətləşin. Doclopid preparatının qəbulu müddətində hamilə qaldığınız halda, dərhal həkiminizlə məsləhətləşin, çünki klopidoqrelin hamiləlik zamanı qəbul edilməsi tövsiyə olunmur.
Bu preparatı qəbul etdiyiniz zaman uşağınızı ana südü ilə qidalandırmamalısınız. Ana südü ilə qidalandırdığınız və ya ana südü ilə qidalandırmanı planlaşdırdığınız halda dərmanı qəbul etməzdən öncə həkiminizlə məsləhətləşin.
İstənilən dərman preparatını qəbul etməzdən əvvəl həkiminizlə və ya əczaçı ilə məsləhətləşin.
Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Doclopid preparatı nəqliyyat vasitələrini və digər potensial təhlükəli mexanizmləri idarəetmə qabiliyyətinə təsir göstərmir və ya cüzi təsir göstərir.
İstifadə qaydası və dozası
Bu preparatı həmişə dəqiqliklə həkiminizin və ya əczaçının dediyi qaydada qəbul edin. Əmin olmadığınız halda həkiminizlə və ya əczaçı ilə məsləhətləşin.
Doclopid preparatının adi gündəlik dozası 75 mq-dır, qida ilə birlikdə və ya qidasız oral və hər gün eyni vaxtda qəbul edilir.
Doclopid preparatını həkiminiz sizə təyin edən müddət ərzində qəbul etməlisiniz.
Böyüklər və yaşlılar
Miokard infarktı (bir neçə günündən başlayaraq 35 gün ərzində), işemik insult (7-ci günündən başlayaraq 6 ay ərzində) və ya periferik arteriyaların xəstəliyi zamanı: Doclopid sutkada 1 dəfə 75 mq dozada təyin olunur.
ST seqmentinin qalxmaması ilə kəskin koronar sindrom (KKS) (qeyri-stabil stenokardiya və ya Q dişciksiz miokard infarktı): müalicə birdəfəlik 300 mq dozada Doclopid ilə başlanılmalıdır. Sonra 75 mq/sut dozada 75-100 mq/sut dozada asetilsalisil turşusu ilə birlikdə davam etdirilməlidir. Asetilsalisil turşusunun dozasının artırılması qanaxmanın yaranma riskini artırdığı üçün 100 mq-dan artıq qəbul edilməməlidir.
ST seqmentinin qalxması ilə kəskin koronar sindrom (KKS): müalicə birdəfəlik 300 mq dozada Doclopid və asetilsalisil turşusu və trombolitiklərlə və ya tombolitiklərsiz başlanılmalıdır. Sonra 75 mq/sut dozada 75-100 mq/sut asetilsalisil turşusu ilə birlikdə dozada davam etdirilməlidir.
75 yaşdan yuxarı xəstələrin Doclopid ilə müalicəsini yükləmə dozası olmadan başlamaq lazımdır. Qarışıq terapiyaya simptomlar yarandıqdan sonra mümkün qədər tez başlanılır və ən azı 4 həftə ərzində davam etdirilir.
Qulaqcıqların fibrilyasiyası (səyirici aritmiya)
Klopidoqrel gündə bir dəfə 75 mq dozada qəbul etmək lazımdır. Klopidoqrel ilə kombinasiyada asetilsalisil turşusunun qəbuluna başlamaq və sonra davam etdirmək lazımdır (75-100 mq/gün).
Doclopid-ın qida və içkilərlə birlikdə istifadəsi
Doclopid qida ilə birlikdə və ya qidasız qəbul edilə bilər.
Doclopid preparatını qəbul etməyi unutduğunuz halda
Doclopid preparatın dozasını qəbul etməyi unutduğunuz halda həmişəki vaxtdan etibarən 12 saat ərzində, dərhal qəbul edin və növbəti tableti adi vaxtında qəbul edin.
12 saatdan artıq unutduğunuz halda, sadəcə həmişəki vaxtda birdəfəlik dozanı qəbul edin.
Unutduğunuz hər dozanı bərpa etmək üçün ikiqat doza qəbul etməyin.
Doclopid preparatını qəbul etməyi dayandırdıqda
Həkiminiz sizə tövsiyə edənədək müalicəni dayandırmayın. Dayandırmazdan öncə həkiminizlə və ya əczaçı ilə əlaqə saxlayın.
Bu preparatın istifadə olunması ilə əlaqədar hər hansı sualınız yarandığı halda, həkiminizdən və ya əczaçıdan soruşun.
Əlavə təsirləri
Bütün dərman preparatları kimi, bu preparat da hər insanda olmasa da, əlavə təsirlərə səbəb ola bilər.
Aşağıdakı hallar baş verdikdə dərhal həkiminizlə məsləhətləşin
• hərarət, infeksiya və ya həddindən artıq yorğunluq. Bu hallar bəzi qan hüceyrələrinin azalmasına görə baş verə bilər.
• dərialtı qırmızı nöqtələr və/və ya şüurun dumanlanması kimi qanaxma ilə əlaqədar olan və ya olmayan dəri və/və ya gözlərin saralması (sarılıq) kimi qaraciyər problemlərinin əlamətləri (bax bənd “Xəbərdarlıq və ehtiyat tədbirləri”)
• ağızda şişkinlik və ya dəridə çatışmazlıqlar, səpgilər və ya göynəmə, dəridə suluqlar. Bu allergik reaksiyanın əlamətləri ola bilər.
Doclopid preparatının ən geniş yayılmış əlavə təsiri (10 nəfərdən 1-də meydana çıxa bilər) qanaxmadır.
Mədədə və ya bağırsaqlarda qanaxma, qançırlar, hematoma (qeyri-adi qanaxma və ya dərialtı qançır), burundan qanaxma, sidikdə qan olma halı kimi baş verə bilər. Çox az hallarda, gözdə, beyindaxili, ağciyər, retroperitonial qanaxma və ya oynaqlarda qansızma halları haqqında məlumatlar daxil olub.
Doclopid preparatını uzun müddət qəbul etdikdə
Özünüzü kəsdikdə və ya zədələndikdə, qanaxmanı saxlamaq həmişəkindən daha uzun müddət çəkə bilər. Bu sizin dərman preparatını qəbul etməyinizlə əlaqədardır, belə ki, o, qan laxtalarının formalaşmasının qarşısını alır. Kiçik kəsiklər və zədələr, məsələn özünü kəsmə, qırxma halları, adətən, heç bir narahatlıq doğurmur. Lakin, qanaxma sizdə narahatlığa səbəb olursa, dərhal həkiminizlə əlaqə saxlayın (bax: “Xəbərdarlıq və ehtiyat tədbirləri”).
Doclopid preparatı ilə əlaqədar digər əlavə təsirlər aşağıdakılardır
• Çox tez-tez müşahidə olunan əlavə təsirlər (10 nəfərdən 1 nəfər məruz qala bilər):
Diareya, qarında ağrı, həzm pozğunluğu və ya qıcqırma.
• Tez-tez müşahidə olunan əlavə təsirlər (100 nəfərdən 1 nəfər məruz qala bilər):
Baş ağrısı, mədə və onikibarmaq xorası, qastrit, qusma, ürəkbulanma, qəbizlik, mədədə və ya bağırsaqlarda həddindən artıq yel, səpgilər, qaşınma, başgicəllənmə, arabir sancı və keyimə hissi, trombositopeniya, leykopeniya, eozinofiliya.
• Bəzən müşahidə olunan əlavə təsirlər (1.000 nəfərdən 1 nəfər məruz qala bilər):
Vertiqo, kişilərdə süd vəzinin böyüməsi, neytropeniya.
• Çox nadir hallarda müşahidə olunan əlavə təsirlər (10.000 nəfərdən 1 nəfər məruz qala bilər):
trombotik trombositopenik purpura, aplastik anemiya, pansitopeniya, aqranulositoz, ağır trombositopeniya, qazanılmış hemofiliya A, qranulositopeniya, anemiya, Kounis sindromu, zərdababənzər xəstəlik, tienopiridinlərə qarşı çarpaz reaktiv hiperhəssaslıq, autoimmun insulin sindromu, ciddi qanaxma, cərrahi yaradan qanaxma, vaskulit, pankreatit, kolit, kəskin qaraciyər çatışmazlığı, hepatit, qaraciyər funksiyasının pozulması, sarılıq, bel ağrısı ilə müşayiət olunan və ya olunmayan kəskin mədə ağrısı; hərarət, öskürəklə əlaqədar tənəffüsdə çətinlik, bronxospazm, interstisial pnevmonit, eozinofil pnevmoniya, ümumi allergik reaksiyalar, məsələn, ürəkgetmə halınadək ani ümumi narahatlıqla ümumi istilik hissi; angioödem, ağızda şişkinlik; dəridə suluqlar, bullyoz dermatit (toksiki epidermal nekroliz, Stivens-Conson sindromu, multiformalı eritema, kəskin yayılmış ekzantematoz pustulyoz), DRESS sindromu, eksfoliativ və ya eritematoz səpgilər, yastı dəmrov, dəridə allergiya; stomatit; qan təzyiqinin düşməsi; şüurun dumanlanması; hallüsinasiya halları; oynaqlarda ağrı; əzələ ağrıları; qidanın dadının dəyişməsi, agevziya, qlomerulonefrit.
Bundan əlavə, həkiminiz sizin qan və ya sidik analizlərinizdə dəyişikliklər müəyyən edə bilər.
Doza həddinin aşılması
Doza həddinin aşılması qanaxma riskinin artmasına səbəb ola bildiyindən, həkiminizlə və ya yaxınlıqda olan xəstəxananın təcili yardım şöbəsi ilə əlaqə saxlayın.
Buraxılış forması
10 tablet ALU/ALU blisterdə. 6 blister içlik vərəqə ilə birlikdə karton qutuya qablaşdırılır.
Saxlanma şəraiti
30°C-dən aşağı temperaturda, işıqdan və rütubətdən qorumaq üçün orijinal qablaşdırmada və uşaqların əli çatmayan yerdə saxlamaq lazımdır.
Yararlılıq müddəti
3 il.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Resept əsasında buraxılır.
İstehsalçı/Qeydiyyat vəsiqəsinin sahibi
Stallion Laboratories Pvt. Ltd., India.
C-1B, 305/2, 3, 4&5, G.I.D.C. Kerala (Bavla), Dist.: Ahmedabad-382 220, Gujarat, India.