PREKOR

PREKOR təsiredici maddəsindən tədricən azad olan örtüklü tabletlər
PRECOR

Beynəlxalq patentləşdirilməmiş adı: Trimetazidine

Tərkibi
Təsiredici maddə: 1 tabletin tərkibində 35 mq trimetazidin dihidroxlorid vardır.
Köməkçi maddələr: kalsium hidrofosfat, mikrokristallik sellüloza, povidlon K-30, ksantan kitrəsi,
susuz kolloidal silisium dioksid, maqnezium stearat, ağ boya (HPMC 6 CPC,
təmizlənmiş talk, PEG 6000, titan dioksid).

Təsviri
Ağ rəngli, dəyirmi formalı, hər iki tərəfi qabarıq, hər iki tərəfi plyonka ilə örtülmüş bikonveks tabletlərdir.

Farmakoterapevtik qrupu
Antianginal vasitələr. Miokardın metabolizmini yaxşılaşdıran preparatlar.
ATC kodu: C01EB15.

Farmakoloji xüsusiyyətləri
Farmakodinamikası
Prekor kardioloji antianginal dərman vasitəsidir. Trimetazidin hipoksiyaya və işemiyaya meyilli hüceyrələrdə energetik metabolizmi qoruyaraq hüceyrədaxili ATF-in səviyyəsinin azalmasının qarşısını alır ki, bu da hüceyrə hemostazını qoruyaraq ion nasoslarının lazımi fəaliyyətini və transmembran natrium-kalium axınını təmin edir.
Prekor ürəkdə energetik metabolizmi optimallaşdırır (yağ turşularının oksidləşməsinin qismən qarşısının alınması nəticəsində uzunzəncirli 3-ketoasil CoA-tiolazanın (3-KAT) inhibə edilməsi hesabına). Bu, qlükozanın oksidləşməsinin və qlikolizin qlükozanın oksidləşməsilə birləşməsinin güclənməsinə səbəb olur. Trimetazidin həmçinin membran fosfolipidlərinin mübadiləsinin yüksəlməsinə və onların membrana nüfuz etməsinə səbəb olur ki, bu da membranın zədələnmədən qorunmasını təmin edir.
Preparatın antianginal xüsusiyyəti energetik substratın (yağ turşularının oksidləşməsindən qlükozanın oksidləşməsinə) keçidilə əsaslanır.
Kardiologiyada stenokardiyalı xəstələrdə preparatın istifadəsi zamanı aşağıdakı hallar qeyd edilir:

• koronar rezervin yüksəlməsi, bununla da müalicənin 15-ci günündən başlayaraq fiziki yüklənmə ilə əlaqədar olan işemiyanın baş verməsinin qarşısı alınır;
• ürək yığılmalarının tezliyinin əhəmiyyətsiz dəyişikliyi ilə qan təzyiqinin kəskin dəyişməsinin məhdudlaşdırılması;
• stenokardiya tutmalarının tezliyinin əhəmiyyətli dərəcədə azalması;
• nitroqliserin qəbulunun əhəmiyyətli dərəcədə ixtisara salınması.

Farmakokinetikası
Trimetazidin daxilə qəbul olunduqdan sonra mədə-bağırsaq sistemindən tez bir zamanda absorbsiya olunur. Maksimal konsentrasiyaya 5 saatdan sonra çatır.
24 saatdan sonra plazma konsentrasiyası bu göstəricinin 11 saat üçün qeyd olunan maksimal
konsentrasiyadan yüksək və ya həmin göstəricinin 75%-ni təşkil edir.
Stabil konsentrasiyaya 60 saatdan sonra çatır. Qida qəbulu trimetazidinin farmakokinetik parametrlərinə təsir etmir.
Paylanma həcmi 4,8 l/kq təşkil edir ki, bu da preparatın toxumalarda yaxşı paylanması ehtimalına gətirir. Plazma zülalları ilə birləşməsi zəifdir (in vitro 16 %). Orqanizmdən əsasən böyrəklər vasitəsilə dəyişilməmiş şəkildə xaric olunur. Yarımxaricolma müddəti 7 saat, 65 yaşdan yuxarı xəstələrdə isə 12 saat təşkil edir.
Trimetazidinin böyrək klirensi kreatininin klirensi ilə korrelyasiya olunur. Böyrək klirensi xəstənin yaşından asılı olaraq azalır.
Yaşlı xəstələr trimetazidini sutkalıq dozanı gündə 2 dəfə olmaqla 2 tablet qəbul etdikdə ekspozisiyanın yüksəlməsi qan plazmasında plasebo ilə müqayisədə heç bir effektlərə səbəb olmur.

İstifadəsinə göstərişlər
Kardiologiya:

• ürəyin işemik xəstəliyinin uzunmüddətli müalicəsi: monoterapiya zamanı stenokardiya tutmalarının qarşısının alınması və ya digər preparatlarla birlikdə istifadəsi.

Əks göstərişlər

• Preparatın istənilən komponentinə qarşı yüksək həssaslıq;
• Hamiləlik və laktasiya dövrü;
• Parkinson xəstəliyi, parkinsonizmin simptomları, tremor, “narahat” ayaqlar sindromu və onlarla bağlı digər hərəki pozğunluqlar.
• 18 yaşa qədər uşaqlar.
• Qeyri-stabil stenokardiya və ya miokard infarktının müalicəsi.
• Ağır böyrək çatışmazlığı.

Xüsusi göstərişlər və ehtiyat tədbirləri
Preparat bazis terapiyada istifadə edilir (lakin stenokardiya tutmalarını qarşısının alınması üçün deyil). Preparatın qeyri-stabil stenokardiya və ya miokard infarktının müalicəsində istifadə etmək əks göstərişdir.
Stenokardiya tutmalarının yaranması zamanı müalicəyə yenidən baxmaq və adaptasiya etdirmək lazımdır (dərman terapiyasının və ya revaskulyarizasiyanın aparılması).
Prekor parkinson simptomlarının (tremor, akineziya, tonusun artması) yaranmasına və ya pisləşməsinə səbəb ola bilər. Bu səbəbdən xəstələri müntəzəm olaraq nəzarət altında saxlamaq lazımdır (xüsusilə yaşlı xəstələri). Şübhəli hallarda xəstə ya nevroloqa və ya müvafiq müayinəyə yönəldilməlidir.
Parkinson simptomları, “narahat” ayaqlar sindromu, tremor, Romberq pozasında dayanıqlıqsız və “sərxoş” yerişi kimi halların yaranması zamanı Prekorin qəbulunu qəti surətdə saxlamaq lazımdır. Əgər parkinsonizmin simptomları preparatın qəbulu dayandıqdan 4 aydan sonra da keçməzsə, nevroloqa müraciət etmək məsləhət görülür.
Hipotenziv preparatlar qəbul edən xəstələrdə Romberq pozasında dayanıqsızlıq və “sərxoş” yeriş və ya arterial təzyiqin enməsi ilə bağlı olan yıxılma halları baş verə bilər.
Klinik məlumatların olmadığı üçün preparatı kreatininin klirensi 30 ml/dəqiqədən az olan, eləcə də qaraciyər funksiyası pozğunluğu olan xəstələrə təyin etmək məsləhət görülmür. Yaşlı xəstələrin müalicəsində preparatın dozasının korreksiya olunmasına ehtiyac yoxdur.
Prekori 75 yaşdan yuxarı xəstələrə ehtiyatla təyin etmək lazımdır.

Digər dərman vasitələri ilə qarşılıqlı təsiri
Məlumat yoxdur.

Hamiləlik və laktasiya dövründə istifadəsi
Əks göstərişdir.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Klinik tədqiqatlar gedişatında trimetazidinin hemodinamikaya təsiri barədə qeydlər olmamışdır. Lakin post qeydiyyat dövründə istifadəsi zamanı başgicəllənmə və yuxuya meylilik kimi əlamətlər müşahidə edildiyi üçün nəqliyyat vasitəsini və digər potensial təhlükəli mexanizmləri idarə etmək məsləhət olunmur.
İstifadə qaydası və dozası
Prekor gündə 2 dəfə (səhər və axşam) 1 tablet yemək vaxtı su ilə qəbul edilir. Tabletləri çeynəmək olmaz.
Preparat uzun müddət qəbul edilir. Müalicə kursunun müddəti fərdi olaraq təyin edilir, ehtiyac olduqda müalicə sxeminə 3 aydan sonra yenidən baxmaq olar.
Böyrəklərin zədələnməsi müşahidə olunan pasiyentlər
Böyrək funksiyalarının orta dərəcəli pozulmasından əziyyət çəkən pasiyentlər üçün (kreatinin klirensi 30-60 ml/dəqiqədə) tövsiyə olunan dozalanma – 1 tablet gündə 1 dəfə səhər saatlarında qida qəbulu zamanı qəbul etmək tövsiyyə olunur.

Əlavə təsirləri
Əlavə təsirlərin tezliyi aşağıdakı parametrlərlə müəyyən edilmişdir: tez-tez (≥1/100 - <1/10); nadir hallarda (≥1/10000 - <1/1000); məlum olmayan tezlik (tezliyi əldə olan məlumatlara görə hesablamaq mümkün deyil).
Həzm sisteminə: tez-tez – qarın nahiyəsində ağrı, diareya, dispepsiya, ürəkbulanma, qusma; məlum olmayan tezlik – qəbizlik.
Ümumi pozğunluqlar: tez-tez – asteniya.
Mərkəzi sinir sisteminə: tez-tez – başgicəllənmə, baş ağrısı; məlum olmayan tezlik – parkinsonizm simptomları (tremor, akineziya, tonusun yüksəlməsi), Romberq pozasının dayanıqsızlığı və “sərxoş” yerişi, “narahat” ayaqlar sindromu, onlarla bağlı olan digər hərəki pozğunluqlar (terapiya bitdikdən sonra adətən bu hallar itir), yuxunun pozulması (yuxusuzluq, yuxuya meylilik).
Dəriyə və dərialtı toxumaya: tez-tez – dəri səpgisi, qaşınma, övrə; məlum olmayan tezlik – kəskin yayılmış ekzantematoz pustulyoz, Kvinke ödemi.
Ürək-damar sisteminə: nadir hallarda – ürəkdöyünmə hissiyyatı, ekstrasistoliya, taxikardiya, arterial təzyiqin enməsi, ümumi zəifliklə müşayiət olunan ortostatik hipotenziya, başgicəllənmə və ya tarazlığın itməsi (xüsusilə hipotenziv preparatlarla eyni vaxtda qəbul edildikdə), üz dərisində qan “axını”.
Qanyaradıcı sistemə: məlum olmayan tezlik – aqranulositoz, trombositopeniya, al-qırmızı trombositopeniya.
Qaraciyərə və ödçıxarıcı yollara: məlum olmayan tezlik – hepatit.

Doza həddinin aşılması
Trimetazidinin doza həddinin aşılması barədə yalnız məhdudlaşdırılmış məlumat vardır. Doza həddi aşıldığı halda simptomatik müalicə aparmaq lazımdır.

Buraxılış forması
10 tablet, blisterdə. 6 blister içlik vərəqə ilə birlikdə karton qutuya qablaşdırılır.

Saxlanma şəraiti
25°С temperaturdan yüksək olmayan və uşaqların əli çatmayan yerdə saxlamaq lazımdır.

Yararlılıq müddəti
3 il.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı
Stallion Laboratories Pvt. Ltd., India.
C-1B, 305/2, 3, 4&5, G.I.D.C. Kerala (Bavla), Dist.: Ahmedabad, Gujarat, India.

Qeydiyyat vəsiqəsinin sahibi
Stallion Laboratories Pvt. Ltd., India.
8th Floor Devpath C.G. Road, Navrangpura Ahmedabad – 380006, India.